اسلام آباد۔21ستمبر(اے پی پی) پاکستان وچ پہلی واری بدھ مت کلچرل اینڈ انفارمیشن سینٹر لوک ورثہ وچ بݨایا ویسی۔ اے تاریخی اقدام بین المذاہب ہم آہنگی، مذہبی سیاحت تے ثقافتی ورثے دے ودھارے کیتے کیتا ویندا پئے۔ وفاقی وزیر قومی ورثہ و ثقافت اورنگزیب خان کھچی ایں منصوبے دا اعلان کریندے آکھیا جو اے سینٹر پاکستان دی کثیرالثقافتی شناخت تے عالمی سیاحواں کیتے خیر مقدمی رویے دا مظہر ہوسی۔ انہاں آکھیا جو جیویں سکھ یاتری پاکستان آندن، اساں چاہندوں جو بدھ مت دے پیروکار وی اساݙے ملک آون تے اتھاں دے مقدس مقامات دا دورہ کرن۔ وفاقی وزیر ݙسایا جو اے سینٹر عبادت تے مراقبے کیتے مخصوص مقامات، بدھ مت ثقافت متعلق معلوماتی مواد تے تاریخی پس منظر ݙیسی۔ اے اقدام قومی ثقافتی پالیسی دا حصہ اے جیڑھی وقتی وزیر اعظم شہباز شریف دی ہدایات تے لانچ کیتی ویسی۔ انہاں مزید آکھیا جو اتے پالیسی اساݙی ثقافتی شناخت دے تحفظ، فنکاراں تے ادیباں کوں بااختیار بݨاوݨ تے پاکستان دا پرامن و تخلیقی چہرہ دنیا دے سامݨے گھن آوݨ دا قومی مشن اے۔ اورنگزیب کھچی ݙسایا جو ایں پالیسی وچ چارے صوبیں دیاں تجویزاں کوں شامل کیتا ویندا پئے تاں جو اینکوں مکمل طور تے جامع بݨایا ونڄ سڳے۔ اساں دنیا کوں اے پیغام ݙیوݨا چاہندوں جو پاکستان مہرگڑھ، ہڑپہ، موئن جو دڑو تے ٹیکسلا جیویں ہزاراں سال پرانی تہذیباں دا امین اے۔ انہاں آکھیا جو پاکستان یونیسکو کوں چار نویں ورثہ جہیں دی شمولیت کیتے درخواستاں ݙتن، کیوں جو 1998 دے بعد توں کوئی نواں مقام شامل نی کیتا ڳیا۔ انہاں ݙسایا جو شاہ اللہ ݙتہ دے غاراں سودھے کئی بدھ مت آثار کوں جدید سہولتاں دے نال عالمی معیار دے سیاحتی مقامات وچ تبدیل کیتا ویندا پئے۔ ثقافتی سفارت کاری دے حوالے نال وفاقی وزیر ݙسایا جو پاکستان ہݨ تائیں 86 ملکاں دے نال معاہدے کیتن تے ووقتی اے تعداد 125 تک ودھاوݨ دا منصوبہ اے۔ انہاں اے وی اعلان کیتا جو ایں سال دا لوک میلہ 12 غیر ملکی ملکاں دے ثقافتی اسٹالز دی میزبانی کریسی، جیڑھا پچھلے سال دے مقابلے وچ ݙوگݨا اے۔ وفاقی وزیر اے وی اعلان کیتا جو پاکستان دی پہلی ڈگری ݙیوݨ آلی فنون لطیفہ دی درسگاہ اڄوکے سال دے چھیکڑ تئیں قائم کیتی ویسی، جݙاں جو لوک ورثہ وچ فنون دی کلاساں دا آغاز تھی چکئے۔ انہاں ݙسایا جو نیشنل لائبریری، پاکستان اکیڈمی آف لیٹرز تے قومی زبان ترقیاتی ادارے دی ڈیجیٹائزیشن دا عمل شروع کر ݙتا ڳئے، جݙاں جو پاکستان دے آثار قدیمہ تے دستاویزی فلماں وی تیار کیتیاں ویندیاں پئن تاں جو عالمی سطح تے اساݙے ثقافتی خزانے کوں اجاگر کیتا ونڄ سڳے۔ چھیکڑ وچ انہاں آکھیا جو بدھ مت کلچرل سینٹر دے قیام تے قومی ثقافتی پالیسی دے نفاذ دے نال پاکستان ثقافتی سفارت کاری، ورثے دے تحفظ تے اپݨے مثبت تشخص دے ودھارے دے ہک نویں دور وچ داخل تھیندا پئے۔
