نیویارک۔26ستمبر(اے پی پی)وزیراعظم محمد شہباز شریف بھارت نال سارے حل تھیوݨ آلے معاملیاں تے جامع اتے نتیجہ خیز مذاکرات کیتے تیاری دا ݙسیندے آکھیا جو پاکستان مشرقی محاذ توں بغیر اکسائے ڳئے جارحیت دا فیصلہ کن ولدا ݙتے، دشمن غرور اچ ٻھریا آئے ٻھل ذلت نال ول ڳئے، پاکستان جنگ جِت ڳھدی اتے ہݨ اساں امن جِتݨ چاہندے ہیں، صدر ٹرمپ امن دے علمبردار ہین، او ویلھے سر اتے فیصلہ کن مداخلت نہ کریندے تاں پوری جنگ دے نتیجے تباہ کن ہوندے، سندھ طاس معاہدہ دی خلاف ورزی اعلان جنگ دے برابر اے، قبضے آلے جموں و کشمیر اچ بھارت دا ظلم و جبر تیکھے ختم تھی ویسی، غزہ اچ اسرائیل ناقابل بیان دہشت کھنݙا ݙتی اے، فوری جنگ بندی دا رستہ کڈھݨا ہوسی، فلسطین کوں ہݨ آزاد تھیوݨا ہوسی، پاکستان کوں ٻاہرلی سرپرستی اچ تھیوݨ آلی دہشت گردی دا سامݨا اے، دہشت گرد گروہ افغان سرزمین توں کم کریندن، افغانستان دی عبوری حکومت دہشت گرد گروہواں دے خلاف مؤثر کارروائی کرے، پاکستان کوں موسمیاتی تبدیلیاں توں وݙے نقصانات دا سامݨا اے، موسمیاتی تبدیلیاں پاروں ڳھدے ونجݨ آلے قرضے معیشت کیتے تباہ کن ہین، اساں ودھ محنت کریسوں، ملک کوں آپݨے پیراں تے کھڑا کریسوں اتے پاکستان کوں ہک عظیم ملک بݨیسوں۔ اے ڳالھ انہاں اقوام متحدہ دی جنرل اسمبلی دے 80 ویں اجلاس دے جنرل مباحثے اچ خطاب کریندے آکھی۔ وزیراعظم جنرل اسمبلی دی نویں چُݨی ڳئی صدر کوں جنرل اسمبلی دے 80ویں اجلاس دی صدارت سنبھالݨ تے مبارکباد ݙتی اتے اقوام متحدہ دے سیکرٹری جنرل انتونیو گوتریس کوں وی اوکھے حالات اچ انہاں دی جراتمندانہ قیادت تے خراج تحسین پیش کیتا۔ وزیراعظم آکھیا جو اڄ دی دنیا پہلے توں کتھائیں ودھ پیچیدہ اے، تنازعے ودھدے پئن، بین الاقوامی قانون دی کھلم کھلا خلاف ورزی کیتی ویندی پئی اے، انسانی بحران ودھدے ویندن، دہشت گردی ہݨ وی ہک طاقتور خطرہ اے، غلط معلومات اتے فیک نیوز اعتماد کوں نقصان ݙیندن، اسلحے دی بے لگام دروک اتے نویں ٹیکنالوجیز تباہ کن غلطیاں دے خطرے کوں ودھیندیاں پین اتے انہاں ساریاں توں ودھ تے موسمیاتی تبدیلی اساݙی بقاء کیتے خطرہ بݨ چُکی اے۔ وزیراعظم آکھیا جو کثیرالجہتی نظام اڄ کوئی آپشن نئیں ٻھل ٻہوں ضروری تھی چکیے۔ انہاں پاکستان دی خارجہ پالیسی کوں اڳونہا کریندے آکھیا جو اساݙی خارجہ پالیسی بانی پاکستان قائد اعظم محمد علی جناح دے وژن آلی اے جیندی بنیاد امن، آپسی احترام اتے تعاون اے، اساں مذاکرات اتے سفارتکاری نال تنازعیاں دے پرامن حل تے یقین رکھدے ہیں۔ وزیراعظم آکھیا جو گزریل سال ایں فورم تے میں خبردار کیتا ہا جو پاکستان کہیں وی ٻاہرلے جارحیت دا فیصلہ کن جواب ݙیسی، اے الفاظ ایں سال مئی اچ اوں ویلھے سچ ثابت تھئے ڄݙاں مشرقی محاذ توں ساݙے تے بغیر اکسائے جارحیت کیتی ڳئی، دشمن غرور اچ ولھیٹا آئے ٻھل ذلت ڳھن تے ول ڳئے۔ وزیراعظم آکھیا جو بھارت پہلگام واقعے دی غیرجانبدارانہ تحقیقات دی اساݙی پیشکش کوں رد کر کے انسانی المیے کوں سیاسی مقاصد کیتے استعمال کریندے اساݙے شہراں اتے بے گناہ شہریاں کوں نشانہ بݨائے، جݙاں ساݙی علاقائی سالمیت اتے قومی سلامتی دی خلاف ورزی تھئی تاں اساں اقوام متحدہ دے چارٹر دے آرٹیکل 51 دے ہیٹھ آپݨے دفاع دا بنیادی حق استعمال کیتے، اساݙیاں بہادر مسلح افواج فیلڈ مارشل سید عاصم منیر دی قیادت اچ بے مثال پیشہ ورانہ صلاحیت، بہادری اتے دانشمندی ݙکھائی، ایئر چیف مارشل ظہیر بابر سدھو دی قیادت اچ ساݙے شاہیناں فضائی حملے کوں پسپا کریندے ہوئیں ست بھارتی طیاریاں کوں مٹی دا ڈھیر بݨا ݙتا، جارحیت کرݨ آلے لوکاں کوں اساݙا فیصلہ کن جواب تاریخ اچ ہمیشہ یاد رکھیا ویسی، ایں فتح دا سہرا اساݙے ہر افسر اتے جوان اتے شہیداں دے وارثاں دے سر اے، انہاں دی عظمت امر اے، اساݙے شہیداں دیاں ماواں دا حوصلہ اساݙی رہنمائی کریندے، انہاں دی قربانی کݙاہیں ضائع نا ویسی، ہر پاکستانی ایں صورتحال اچ ہک مضبوط دیوار “بنیان مرصوص” بݨ تے کھڑا رہے۔ وزیراعظم آکھیا جو اساں طاقت اچ ہووݨ دے باوجود جنگ بندی تے تیار تھئے جو صدر ڈونلڈ ٹرمپ دی جراتمند اتے اچی سوچ آلی قیادت نال ممکن تھئی، اساں جنگ بندی کیتے فعال کردار ادا کرݨ تے صدر ٹرمپ اتے انہاں دی ٹیم دے معترف ہیں، انہاں دیاں کوششاں ہک وݙے خطرناک تصادم کوں ٹال ݙتت، ڄیکر او ویلھے سر اتے فیصلہ کن مداخلت نہ کریندے تاں پوری جنگ دے نتیجے تباہ کن ہوندے، صدر ٹرمپ امن دے علمبردار ہن اتے امن کیتے انہاں دیاں کوششاں تے ہی پاکستان نوبل امن ایوارڈ کیتے انہاں دا ناں پیش کیتے۔ وزیراعظم چین، ترکیہ، سعودی عرب، قطر، آذربائیجان، ایران، متحدہ عرب امارات اتے سیکرٹری جنرل اقوام متحدہ سودھا پاکستان دے دوستاں اتے شراکت داراں دا شکریہ ادا کیتا جنہاں نازک ویلھے اچ پاکستان دی سفارتی حمایت کیتی، پاکستان جنگ جِت ڳھدی، ہݨ اساں پوری دنیا اچ امن جِتݨ چاہندے ہیں، پاکستان بھارت نال سارے حل تھیوݨ آلے معاملیاں تے جامع اتے نتیجہ خیز مذاکرات کیتے تیار اے، جنوبی ایشیا کوں “اشتعال انگیز” نئیں ٻھل “فعال” قیادت دی لوڑھ اے، بھارت دا سندھ طاس معاہدے کوں معطل کرݨ دا یک طرفہ اتے غیرقانونی اقدام نہ صرف ایں معاہدے دیاں شرطاں ٻھل بین الاقوامی قانون دی وی خلاف ورزی اے، پاکستان اے ڳالھ بالکل واضح کر ݙتی اے اتے کہیں کوں کوئی شک نئیں ہووݨا چاہیدا جو اساں پاݨیاں تے آپݨی 24 کروڑ آبادی دے ناقابل تنسیخ حق دا ودھ دفاع کریسوں، ایں معاہدے دی خلاف ورزی ساݙے کیتے اعلان جنگ دے برابر اے۔ وزیراعظم آکھیا جو او ایں ایوان دے ذریعے کشمیری عوام کوں یقین ݙویندن جو او انہاں دے نال کھڑن، پاکستان انہاں دے نال کھڑے اتے انشاء اللہ تیکھے قبضے آلے جموں و کشمیر اچ بھارت دا ظلم و جبر ختم تھی ویسی، کشمیری عوام ہک غیرجانبدارانہ ریفرنڈم نال اقوام متحدہ دی نگرانی اچ آپݨا حق خودارادیت حاصل کریسن۔ فلسطین دے حوالے نال وزیراعظم آکھیا جو فلسطینی عوام دی حالت زار ساݙے دور دے ساریاں توں ودھ دل ہلا ݙیوݨ آلے المیاں اچوں ہک اے، اے لمبی ناانصافی عالمی ضمیر تے دھٻا اتے اساݙی اجتماعی اخلاقی ناکامی اے، اٹھ ݙہاکیاں توں فلسطینی عوام آپݨے وطن تے اسرائیل دے وحشیانہ قبضے کوں حوصلے نال برداشت کریندے پئن، غزہ اچ اسرائیلی جارحیت تریمتاں اتے نیاݨیاں تے اینڄھا ظلم وسائے جیڑھا شاید کݙاہیں ݙیکھݨ کوں نہ ملیا ہووے، مغربی کنارے اچ ہر گزردا ݙینھ نویں بربریت گھدی آندے، غیر قانونی آباد کار دہشت کھنݙیندن اتے بغیر کہیں جرم دے قتل کریندن، غزہ اچ اسرائیل دے نسل کشی حملیاں توں تریمتاں اتے نیاݨیاں اچ ناقابل بیان دہشت پھیلا ݙتی اے جیںدا دنیا دی تاریخ اچ اساں کݙاہیں مشاہدہ نی کیتا، آپݨے بُرے مقاصد دے اندھے تعاقب اچ اسرائیلی قیادت ہک شرمناک مہم چلائی جیکوں تاریخ ہمیشہ کالا ترین باب دے طور تے یاد رکھیسی۔ وزیراعظم یاد ݙوایا جو اساں ساریاں مشوم ہند رجب دی گم تھئی آواز سُݨی جیڑھی ملبے ہیٹھ دبی ڄیوݨ منڳدی پئی ہئی، کیا تساں سوچ سڳدے و جو او تہاݙی دھی ہووے ہا؟ کیا تساں سوچ سڳدے او جو ایںدے تے رحم نہ کیتا ونجے؟ میݙا اتے پوری امت مسلمہ دا ٻھل پوری انسانیت دا ݙکھ اے ہے جو اساں ہند رجب کوں بچا نئیں سڳے جیںدے تے او ساکوں نہ صرف ایں دنیا ڄڳ اچ ٻھل اڳلے جہان اچ وی معاف نا کریسی، جیویں آکھیا ویندے جو “ساریاں توں چھوٹے تابوت ساریاں توں بھارے ہوندن”، میں جاݨداں کیونجو حالیہ بھارتی جارحیت اچ ست سالہ ارتضیٰ عباس دا نکڑا تابوت میں وی چاتا۔ وزیراعظم آکھیا جو اساکوں انہاں ٻالاں کوں ناکام نئیں تھیوݨ ݙیوݨا چاہیدا،ایندے کیتے اساکوں فوری جنگ بندی دا رستہ کڈھݨا ہوسی۔ وزیراعظم آکھیا جو پاکستان فلسطینی عوام دے ایں مطالبے دی بھرپور حمایت کریندے جو 1967ء توں پہلے دیاں سرحداں تے مبنی خودمختار فلسطینی ریاست قائم کیتی ونجے جیںدا دارالحکومت القدس الشریف ہووے، فلسطین ہݨ مزید اسرائیلی زنجیراں اچ نئیں راہ سڳدا، ایکوں آزاد تھیوݨا ہوسی۔ وزیراعظم آکھیا جو پاکستان 1988ء اچ فلسطینی ریاست کوں منݨ آلے پہلے ملکاں اچ شامل ہا، اساں انہاں ملکاں دا خیرمقدم کریندے ہیں جنہاں ہݨ فلسطین کوں منیے، اساں ٻئے ملکاں تے وی فلسطین کوں تسلیم کرݨ تے زور ݙیندے ہیں کیونجو ویلھا کہیں دا انتظار نئیں کریندا۔ وزیراعظم آکھیا جو او صدر ٹرمپ ولوں عرب و اسلامی ملکاں کوں اقوام متحدہ اچ مشاورتی اجلاس کیتے سَݙݨ دے ویلھے سر اقدام تے انہاں دے شکر گزار ہین، ایںدے نال جنگ بندی دی نویں امید پیدا تھئی اے، ایں امن اقدام دا کریڈٹ وی صدر ٹرمپ کوں وںڄݨا چاہیدے۔ انہاں آکھیا جو اسرائیل دا دوحہ تے حالیہ حملہ اتے ٻئے ملکاں دی خودمختاری دی خلاف ورزیاں ایںدے باغیانہ رویے کوں ظاہر کریندن، پاکستان برادر ملک قطر دے عوام دے نال کھڑے، اساں یوکرین تنازعے دے پرامن حل دی وی حمایت کریندے ہیں تاں جو انسانی تکالیف اتے عالمی بحران ختم تھی سڳے. وزیراعظم آکھیا جو پاکستان ہر طرح دی دہشت گردی دی مذمت کریندے، پاکستان ݙو ݙہاکیاں توں ودھ عرصے توں دہشت گردی دے خلاف فرنٹ لائن ملک دے طور تے کردار ادا کریندا پئے اتے ایں سانڳے 90 ہزار جاناں دی قربانی ݙے چُکیے جنہاں اچ اساݙیاں تریمتیں، نیاݨے، بزرگ، ڈاکٹر، انجینئرز اتے ٻئے شامل ہین، نیویارک، لندن، لاہور اتے دنیا دے کہیں وی مقام تے کہیں دی زندگی ڳھنݨ ہکو جھیاں اے، پاکستان انسداد دہشت گردی اتے دنیا اچ امن دے قیام کیتے لازوال قربانیاں ݙتین، اساݙیاں انہاں قربانیاں دا اعتراف کیتا وںڄݨا چاہیدے۔ انہاں آکھیا جو دہشت گردی دی وجہ نال پاکستان 150 ارب ڈالر توں ودھ دا معاشی نقصان چا چُکیے، اڄ اساکوں ٻاہرلی سرپرستی اچ تھیوݨ آلی دہشت گردی دا سامݨا اے، ٹی ٹی پی، فتنہ الخوارج، فتنہ ہندوستان، بی ایل اے اتے ایںدے مجید بریگیڈ دے دہشت گردی دا سامݨا کریندے پئے ہیں، اے گروہ افغان سرزمین توں کم کریندن اتے جعفر ایکسپریس جھئیں خوفناک حملیاں دے ذمے وار ہن جیکوں یرغمال بݨایا ڳیا ہا ٻھل اساݙیاں مسلح افواج اتے قانون نافذ کرݨ آلے اداریاں کارروائی کر کے یرغمالیاں کوں رہا کرایا اتے دہشت گرداں کوں انہاں دے انجام تئیں پُڄایا۔ وزیراعظم آکھیا جو اساݙے سکیورٹی ادارے انہاں دہشت گرداں نال لڑدے پئن اتے اساں ایں جنگ کوں آخری دہشت گرد دے مکݨ تئیں جاری رکھسوں۔ انہاں آکھیا جو نیڑے دا ہمسایہ ہوندے پاکستان دا پرامن افغانستان نال سدھا تعلق اے، ساکوں یقین اے جو ترقی و خوشحالی دی کُنجی علاقائی استحکام اتے رابطے اچ لُکی ہوئی اے، پاکستان سارے شراکت داراں نال رل تے انسانی بنیاداں تے امداد، معاشی بحالی اتے افغانستان اچ ہک جامع سیاسی فریم ورک دی حوصلہ افزائی کیتے ردھا ہوئے، عبوری افغان حکومت کوں تریمتیں دے حقوق سودھا انسانی حقوق دی پاسداری کرݨی چاہیدی اے اتے اساں توقع کریندے ہیں جو او دہشت گرد گروہواں دے خلاف مؤثر کارروائی کریسن اتے اے یقینی بݨیسن جو افغان سرزمین کہیں وی ملک دے خلاف دہشت گردی کیتے استعمال نہ تھیوے۔ وزیراعظم آکھیا جو نفرت انگیز تقریراں، امتیازی سلوک یا تشدد دی کہیں وی بندے یا مذہب دے خلاف کوئی گنجائش نئیں ہووݨی چاہیدی، ہندوتوا تے مبنی انتہا پسندی نہ صرف خطے ٻھل پوری دنیا کیتے خطرہ اے، اسلاموفوبیا دے خطرے کوں عالمی سطح تے منیا ویندا پئے، پاکستان ایں مسئلے نال نبڑݨ کیتے اقوام متحدہ دے خصوصی نمائندے دی تقرری دا خیرمقدم کریندے۔ انہاں آکھیا جو ماحولیاتی بحران ساریاں توں فوری عالمی چیلنج اے، 2022 اچ پاکستان کوں شدید سیلاب دا سامݨا کرݨا پئے جیندے نقصانات 34 ارب ڈالر توں ودھ ہین، ایںدے علاوہ قیمتی جاناں وی ضائع تھئین، ایں سال ول ہک وݙا سیلاب ہزاراں دیہات وہا تے ڳھن ڳئے، لکھاں بندے بے گھر تھئن، ہک ہزار توں ودھ جاناں ضائع تھئن اتے کھیت کھلیان تباہ تھی ڳئے، فصلاں، مال مویشیاں اتے جائیداد دا ارباں ڈالر دا نقصان تھئے۔ انہاں آکھیا جو پاکستان آپݨی غیر معمولی استقامت نال ایں آفت دا مقابلہ کریندا پئے، حکومت موسمیاتی ایمرجنسی نافذ کر ݙتی اے، 2022ء اتے 2025ء دے تباہ کن سیلاب موسمیاتی تبدیلیاں پاروں آئے۔ انہاں یاد ݙوایا جو پاکستان دا عالمی گیساں دے اخراج اچ حصہ ہک فیصد توں وی گھٹ ہے ٻھل پاکستان ماحولیاتی تبدیلیاں توں شدید متاثرہ ملکاں اچ شامل اے، موسمیاتی تبدیلیاں نال تھیوݨ آلے نقصانات پاروں ساکوں قرضے گھنݨے پوندن، اے انصاف نئیں، قرضے معیشت کیتے تباہ کن ہین، اساں ودھ محنت کریسوں، آپݨے ملک کوں آپݨے پیراں تے کھڑا کریسوں اتے پاکستان کوں ہک عظیم ملک بݨیسوں۔ وزیراعظم آکھیا جو اساں معیشت دی بہتری کیتے ڈھانچہ جاتی اصلاحات کیتن، ٹیکس نظام کوں جدید بݨائے، سرمایہ کاری ودھائی اے اتے ڈیجیٹل ٹیکنالوجیز، مصنوعی ذہانت اتے کرپٹو کوں اپنائے، انفراسٹرکچر، توانائی، صنعت، زراعت، کان کنی اتے ٹیکنالوجی اساݙیاں ترجیحاں ہین۔ وزیراعظم آکھیا جو صدر شی جن پنگ دے تاریخی بیلٹ اینڈ روڈ انیشی ایٹو دے ہیٹھ چین پاکستان اقتصادی راہداری دے ذریعے تزویراتی شراکت داری اساݙی ترقی اچ مدد ݙیندی اے۔ انہاں زیادہ منصفانہ اتے جامع ترقی کیتے مؤثر فریم ورک دے ذریعے گلوبل گورننس انیشی ایٹو سودھا صدر شی جن پنگ دے وژن اتے دوراندیشی کوں سراہا۔ وزیراعظم آکھیا جو پاکستان اقوام متحدہ دی سلامتی کونسل دے غیر مستقل رکن دی حیثیت نال تنازعیاں کوں روکݨ کیتے آپݨا تعمیری کردار ادا کریندا پئے۔ انہاں آکھیا جو ریزیولوشن 2788 دی متفقہ منظوری کثیرالجہتی اتے اقوام متحدہ دے چارٹر تے اساݙی اجتماعی وابستگی دی نویں بݨاوٹ اے۔ وزیراعظم یقین ݙوایا جو پاکستان ہک فعال اقوام متحدہ اتے تعاون تے مبنی کثیرالجہتی نظام کیتے ہمیشہ امن، انصاف اتے ترقی دا علمبردار راہسی جیڑھہا ساریاں کیتے منصفانہ، مفید اتے بہتر ہووے۔ وزیراعظم جنرل اسمبلی دے 80 ویں اجلاس دی مناسبت نال آکھیا جو 80 ویں اجلاس کوں صرف ہک تاریخ دی یادگار نہ رہݨ ݙیوو، آؤ اساں آندے 80 سالاں کیتے تاریخ بݨاوں، اساں سارے رَل تے بہتری کیتے کم کروں۔
