اسلام آباد۔12مئی (اے پی پی) وفاقی کابینہ دی 9 مئی دے واقعیاں دے خلاف مسلح فوج دے ترجمان دے بیان دی تائید تے حمایت کریندیں ہوئیں فیصلہ کیتے جو ریاستی دشمنی کرݨ آلیاں نال کوئی رعایت نہ کیتی ونڄے، آئین تے قانون دے مطابق سخت ترین کاروائی کر تے ملوث عناصر کوں عبرت دی مثال ٻݨایا ونڄے۔وزیراعظم آفس دے میڈیا ونگ توں جاری بیان موجب وزیراعظم شہبازشریف دی صدارت اچ وفاقی کابینہ دا اجلاس جمعے کوں وزیراعظم ہاؤس اچ تھیا۔ اجلاس ملک دی اڄوکی صورتحال تے تفصیلی غور کیتا۔ وفاقی کابینہ دے اجلاس اچ اہم فیصلے کیتے ڳے۔ وزیر قانون وانصاف سینیٹر اعظم نذیر تارڑ عمران خان دی القادر ٹرسٹ کرپشن کیس اچ قانونی طور گرفتاری کیتی ڳی اتے ولا اچانک سپریم کورٹ دے حکم تے رہائی بارے حقائق تے کابینہ کوں بریفنگ ݙتی۔ وزیر داخلہ رانا ثنا اللہ خاں 9 مئی 2023 کوں پی ٹی آئی دے کارکناں ولوں حساس ریاستی ادارے، عمارتاں، جناح ہاؤس، شہدا اتے غازیاں دی یادگاراں دی بے حرمتی، بھن تروڑ ، قومی نشریات رکواوݨ، سوات موٹروے، ریڈیو پاکستان سودھے ٻے سرکاری تے نجی املاک اتے ڳاݙیاں کوں ساڑݨ، سرکاری اہلکاراں اتے عام شہریاں تے تشدد، مریضاں کوں لہا تے ایمبولینس کوں ساڑݨ جیھے واقعیاں دی مذمت کیتی اتے آکھیا جو اینکوں آئینی تے جمہوری احتجاج نی آکھیا ونڄ سڳدا۔ اے دہشت گردی اتے ملک دشمنی اے جئیں کوں کہیں صورت قبول کائنا کیتا ویسی۔ اجلاس نو مئی دے واقعیاں دے خلاف مسلح فوج دے ترجمان دے بیان دی تائید تے حمایت کریندیں ہوئیں آکھیا جو ریاستی دشمنی کرݨ آلیاں نال کوئی رعایت نہ کیتی ونڄے، آئین تے قانون دے مطابق سخت ترین کاروائی کر تے ملوث عناصر کوں عبرت دی مثال ٻݨایا ونڄے۔ اجلاس افسوس کریندیں ہوئیں آکھیا جو پچھتر سالیں اچ پاکستان دا ازلی دشمن جو نہ کر سڳیا او ک?? ہک شرپسند فارن فنڈڈ جماعت اتے اوندے لیڈراں کر ݙکھائے۔ اجلاس عوام کوں خراج تحسین پیش کیتا جو انہاں کرپشن،60 ارب روپے دے قومی خزانے دی لٹ مار کرݨ اتے نو ملک دے ݙینھ ملک دشمنی ، دہشت گردی دی منصوبہ بندی دے ماسٹر مائینڈ دی گرفتاری نال اعلان لاتعلی کیتا اتے آئین تے قانون دا ساتھ ݙتا۔ اجلاس مسلح جتھیاں دی وسدی گولیاں اچ عوام دی جان تے مال اتے ریاستی سرکاری تے نجی املاک دی حفاظت کیتے اپݨی جاناں دی پرواہ نہ کریندیں ہوئیں تحفظ اتے دفاع دا فرض نبھیندیں ہوئیں افواج پاکستان، رینجرز، پولیس اتے قانون نافذ کرݨ آلے سارے اداریاں دے افسراں اتے اہلکاواں کوں خراج تحسین پیش کیتا۔ اجلاس صدر عارف علوی دے وزیراعظم شہبازشر یف کوں خط تے مایوسی دا اظہار کریندیں ہوئیں آکھیا جو اے خط ثبوت اے جو صدر عارف علوی ریاست دے سربراہ توں ودھ پارٹی دے ورکر نظر امدے پن۔ ہک واری ولا انہاں آئین تے پاکستان دی بجائے عمران خان نال اپݨی تابعداری دا ثبوت ݙتے۔
